الەمدىك بوكستا مەرەيىمىزدى ءوسىرىپ جۇرگەن بوكسشىلاردىڭ ءبىرى جانات جاقيانوۆ بىرنەشە ساعاتتان كەيىن رينگكە شىقپاق. بۇل جولى ول كارەراسىنداعى ەڭ ماڭىزدى كەزدەسۋگە شىعادى دەۋگە بولادى. ويتكەنى, جانات WBA نۇسقاسى بويىنشا «سۋپەر-چەمپيون», IBO تۇجىرىمى بويىنشا چەمپيون اتاقتارى ءۇشىن بوكستاسادى. قارسىلاس تا وتە مىقتى. ول وسى بەلبەۋلەردىڭ قازىرگى يەگەرى امەريكالىق 30 جاستاعى روۋشي ۋوررەن. اۋەسقوي جانە كاسىپقوي بوكستاعى جولى مەن جەتىستىكتەرىنە قاراپ, جاناتتى قانداي ايقاس كۇتىپ تۇرعانىن باعامداۋعا بولادى.
اۋەسقوي بوكس
روۋشي ۋوررەن 2004 جىلى 48 كيلو سالماق دارەجەسىندە افينا وليمپياداسىنا قاتىستى, بىراق ىرىكتەۋ كەزەڭىنەن وتە المادى. الايدا, ول كەزدە ۋوررەن 17 جاستا بولاتىن. كەلەسى جىلى قىتايدا وتكەن الەم بىرىنشىلىگىنە 51 كگ سالماقتا قاتىسىپ, قولا جۇلدەگە قول جەتكىزدى. 2007 جىلى چيكاگودا ءدال وسى سالماقتا الەم چەمپيونى اتاندى. 2011 جىلى ءۇشىنشى رەت قاتارىنان الەم چەمپيوناتىنا قاتىسقان ول قولا جۇلدەگەر اتاندى.
ازدى-كوپتى ءبىراز تاجىريبە جيناعانمەن, ۋوررەننىڭ وليمپيادا ويىندارىندا جولى بولا قويمادى. 2008 جىلى بەيجىڭدە 51 كەلىدە باعىن سىناعان ول العاشقى كەزدەسۋلەردىڭ بىرىندە جەڭىلدى. ال 2012 جىلى لوندوندا 52 كەلىدە شىعىپ, تەك 9-ورىننان عانا كورىندى.
كاسىپقوي بوكس
لوندون وليمپياداسىنان كەيىن ول كاسىپقوي رينگتە باعىن سىناۋعا دەن قويدى. سول جىلى قاراشا ايىندا لۋيس ريۆەرامەن شارشى الاڭعا شىعىپ, تورەشىلەردىڭ شەشىمىمەن العاشقى جەڭىسىنە قول جەتكىزدى. اراعا ءبىر اي سالىپ, دەۆيد رەيەسپەن كۇش سىناسادى. تارتىستى وتكەن كەزدەسۋدە ۋوررەن ودان دا باسىم ءتۇستى. روۋشي ءۇشىن اسىرەسە, 2013-2014 جىلدار ءساتتى بولدى. وسى ۋاقىت ارالىعىندا باس-اياعى 11 مارتە رينگكە شىعىپ, ءبارىن دە جەڭىسكە جەتتى. 2015 جىلى العاشقى تيتۋلدى جەكپە-جەگىن وتكىزدى. 2 تامىزدا دومينيكاندىق حۋان كارلوس پايانومەن WBA (Super) جانە IBO نۇسقاسى بويىنشا ۆاكانتتى بەلبەۋلەرى ءۇشىن جۇدىرىقتاسادى. بۇعان دەيىن قوس بوكسشى دا ەشكىمنەن جەڭىلىپ كورمەگەن-ءدى. دەگەنمەن, روۋشي ۋوررەن ءدال وسى تۇستا ۇپاي سانى بويىنشا ەسە جىبەرىپ الدى.
قارىمتا كەزدەسۋ 2016 جىلدىڭ 18 ماۋسىمىندا ءوتتى. بۇل كەزدەسۋدە روۋشي جەڭدى. ءسويتىپ, وسى كۇنى ساراپقا سالىنعان WBA (Super) جانە IBO بەلبەۋلەرىنىڭ جاڭا يەسى اتاندى.
ايتا كەتەيىك, WBA نۇسقاسىنىڭ ۋاقىتشا چەمپيونى بولعاندىقتان, قازاقستاندىق بوكسشى – امەريكالىقتىڭ يەلىگىندەگى بەلبەۋلەردىڭ مىندەتتى ۇمىتكەرى. ايقاس بۇگىن ۋوررەننىڭ تۋىپ-وسكەن جەرى وگايو شتاتىندا وتەدى. ءبىر قىزىعى, جاقيانوۆ بۇگىنگە دەيىن امەريكادا جەكپە-جەك وتكىزىپ كورمەگەن. ناقتىراق ايتقاندا, قازاقستان, موناكو, بولگاريا, اۆستراليا, بەلارۋس, انگليا, سولتۇستىك يرلانديا, گونكونگ, شۆەيتساريا, وزبەكستان, تايلاند جانە رەسەي جەرىندە جۇدىرىقتاسقان بولاتىن. ال روۋشي 15 كەزدەسۋىنىڭ ءبارىن ءوز ەلىندە وتكىزگەن.
بۇل ايقاستى نازارىنان تىس قالدىرماعان بۋكمەكەرلىك كەڭسەلەر بىرەر اي بۇرىن قوس بوكسشىعا ارنالعان كوەففيتسيەنتتەردى جاريالادى. بۇل كورسەتكىش بويىنشا ۋوررەن فاۆوريت سانالىپ وتىر. ءباس تىگەتىندەر ءۇشىن امەريكالىقتىڭ جەڭىسىنە 1.20-1.25, قازاقستاندىقتىڭ جەڭىسىنە 4.00-4.30 كوەففيتسيەنت بەردى. كەزدەسۋدىڭ جەڭىمپازى توعىزىنشى راۋندتان كەيىن انىقتالادى دەگەن دە بولجام بار.
وسى جەردە «جاقيانوۆپەن سالىستىرعاندا ەكى ەسەدەي از كەزدەسۋ وتكىزسە دە, ساراپشىلار نە سەبەپتى ۋوررەندى فاۆوريت سانايدى؟» – دەيتىن ويدىڭ تۋاتىنى زاڭدى. وعان بىرنەشە سەبەپ بولسا كەرەك.
بىرىنشىدەن, امەريكالىق بوكسشى بۇل جەكپە-جەگىن دە تۋعان جەرىندە وتكىزەدى. تيىسىنشە, زالداعى بارلىق جانكۇيەردىڭ قولداۋىنا يە بولادى. ەكىنشىدەن, بۇل ايقاسقا ۋوررەننىڭ ەكى بىردەي بەلبەۋى قويىلماق. ارينە, پايانومەن ەكى رەت كەزدەسىپ بارىپ, ارەڭ دەگەندە جەتكەن تيتۋلدارىنان وڭاي ايىرىلماسى انىق. ۇشىنشىدەن, قوس بوكسشىنىڭ اراسىنداعى جاس ايىرماشىلىعى. ۋوررەن جاقيانوۆتان ءتورت جاس كىشى. بوكس ءۇشىن ناعىز پىسكەن شاعىندا. تورتىنشىدەن, جاقيانوۆ سوڭعى جەكپە-جەگىن 2015 جىلدىڭ قاراشا ايىندا ۆەنەسۋەلالىق يونفرەز پارەحوعا قارسى وتكىزگەن. بۇگىنگە دەيىن جاراقاتىنا بايلانىستى شارشى الاڭعا شىعا الماي كەلدى. ونىڭ ۇستىنە ۇزاق ۇزىلىستەن كەيىن تيتۋلدى ۇرىسقا شىعۋ كىمگە بولسىن وڭاي تيمەسى انىق.
ستاتيستيكا جاقيانوۆتى بۇگىن اۋىر ايقاس كۇتىپ تۇرعانىن كورسەتەدى. الايدا, جانات تا وڭاي شاعىلاتىن جاڭعاق ەمەس. ول بۇعان دەيىن 28 كەزدەسۋ وتكىزىپ, تەك بىرەۋىندە عانا قارسىلاسىنا ەسە جىبەرگەن. جاتتىقتىرۋشىسى – كاسىپقوي بوكس جۇلدىزدارىنىڭ ءبىرى ريككي حاتتون. مۇنى دا جاناتتىڭ ۇلكەن ارتىقشىلىعى دەپ ساناۋعا بولادى.
ايان ءابدۋالي, "ەگەمەن قازاقستان"
